gham-e-hayat ko apnao zindagi kar lo

ġham-e-hayāt ko apnāo zindagī kar lo

ab āñkheñ khol do ik pal ko raushnī kar lo

ġhamoñ ke daur meñ tum ko agar hai ḳhush rahnā

to muskurāo zarā dard meñ kamī kar lo

isī sahāre maiñ ik umr kaaT saktā huuñ

nazar se chhū ke mire ḳhat ko surma.ī kar lo

kise ḳhabar hai ki baaqī hai zindagī kab tak

ye mashvara hai ki ab mujh se dostī kar lo

ik ajnabī se sune maiñ ne tazkire apne

ab is se achchhā hai charchā galī galī kar lo

tum apnī zaat ko mahsūs kar na pāoge

tum apnī zaat se mujh ko agar nafī kar lo

bhaTak rahe ho udāsī ke dasht meñ 'āfāq'

tumheñ ye kis ne kahā thā ki āshiqī kar lo

gham-e-hayat ko apnao zindagi kar lo

ab aankhen khol do ek pal ko raushni kar lo

ghamon ke daur mein tum ko agar hai KHush rahna

to muskurao zara dard mein kami kar lo

isi sahaare main ek umr kaT sakta hun

nazar se chhu ke mere KHat ko surmai kar lo

kise KHabar hai ki baqi hai zindagi kab tak

ye mashwara hai ki ab mujh se dosti kar lo

ek ajnabi se sune main ne tazkire apne

ab is se achchha hai charcha gali gali kar lo

tum apni zat ko mahsus kar na paoge

tum apni zat se mujh ko agar nafi kar lo

bhaTak rahe ho udasi ke dasht mein 'afaq'

tumhein ye kis ne kaha tha ki aashiqi kar lo