gham-e-hayat mein koi kami nahin aai

ġham-e-hayāt meñ koī kamī nahīñ aa.ī

nazar-fareb thī terī jamāl-ārā.ī

vo dāstāñ jo tirī dilkashī ne chheḌī thī

hazār baar mirī sādgī ne dohrā.ī

fasāne aam sahī merī chashm-e-hairāñ ke

tamāshā bante rahe haiñ yahāñ tamāshā.ī

tirī vafā tirī majbūriyāñ bajā lekin

ye sozish-e-ġham-e-hijrāñ ye sard tanhā.ī

kisī ke husn-e-tamannā kā paas hai varna

mujhe ḳhayāl-e-jahāñ hai na ḳhauf-e-rusvā.ī

maiñ sochtā huuñ zamāne kā haal kyā hogā

agar ye uljhī huī zulf tū ne suljhā.ī

kahīñ ye apnī mohabbat kī intihā to nahīñ

bahut dinoñ se tirī yaad bhī nahīñ aa.ī

gham-e-hayat mein koi kami nahin aai

nazar-fareb thi teri jamal-arai

wo dastan jo teri dilkashi ne chheDi thi

hazar bar meri sadgi ne dohrai

fasane aam sahi meri chashm-e-hairan ke

tamasha bante rahe hain yahan tamashai

teri wafa teri majburiyan baja lekin

ye sozish-e-gham-e-hijran ye sard tanhai

kisi ke husn-e-tamanna ka pas hai warna

mujhe KHayal-e-jahan hai na KHauf-e-ruswai

main sochta hun zamane ka haal kya hoga

agar ye uljhi hui zulf tu ne suljhai

kahin ye apni mohabbat ki intiha to nahin

bahut dinon se teri yaad bhi nahin aai