gham-e-insan ki sajai hui duniya hun main

ġham-e-insāñ kī sajā.ī huī duniyā huuñ maiñ

anjuman mere tasavvur meñ hai tanhā huuñ maiñ

tapish o dard ke asrār se vāqif huuñ magar

mujh ko ye zo.am nahīñ hai ki masīhā huuñ maiñ

jaane kyā shai mire siine meñ bharī hai aisī

sham-e-sozāñ kī tarah jaltā pighaltā huuñ maiñ

na kashish huuñ maiñ zamīñ kī na huuñ paanī kā uchhāl

zarre uḌtā huā bahtā huā dariyā huuñ maiñ

roz paiġhām-e-mohabbat mujhe detī hai hayāt

rāh-e-dushvār se āsūda guzartā huuñ maiñ

chārasāzī ġham-e-insāñ kī hai buniyād-e-amal

zindagī hai yahī jis ke liye jiitā huuñ maiñ

pairvī-e-havas-e-ḳhām na hogī mujh se

maqsad-e-zābta-e-ishq samajhtā huuñ maiñ

asr-e-hāzir ke numā.inda haiñ mere ash.ār

ġham-e-insāñ ko taġhazzul meñ samotā huuñ maiñ

jazba-e-ḳhidmat-e-insāñ hai 'matīn' āb-e-hayāt

shukr-sad-shukr ai ehsās ki achchhā huuñ maiñ

gham-e-insan ki sajai hui duniya hun main

anjuman mere tasawwur mein hai tanha hun main

tapish o dard ke asrar se waqif hun magar

mujh ko ye zoam nahin hai ki masiha hun main

jaane kya shai mere sine mein bhari hai aisi

sham-e-sozan ki tarah jalta pighalta hun main

na kashish hun main zamin ki na hun pani ka uchhaal

zarre uDta hua bahta hua dariya hun main

roz paigham-e-mohabbat mujhe deti hai hayat

rah-e-dushwar se aasuda guzarta hun main

chaarasazi gham-e-insan ki hai buniyaad-e-amal

zindagi hai yahi jis ke liye jita hun main

pairwi-e-hawas-e-KHam na hogi mujh se

maqsad-e-zabta-e-ishq samajhta hun main

asr-e-hazir ke numainda hain mere ashaar

gham-e-insan ko taghazzul mein samota hun main

jazba-e-KHidmat-e-insan hai 'matin' aab-e-hayat

shukr-sad-shukr ai ehsas ki achchha hun main