gham-e-insan se jo dil shoala-ba-jaan hota hai

ġham-e-insāñ se jo dil sho.ala-ba-jāñ hotā hai

vahī har daur meñ memār-e-jahāñ hotā hai

dil meñ rahrav ke agar azm-e-javāñ hotā hai

gaam bhaTkā bhī to manzil kā nishāñ hotā hai

hoñT siine se sivā soz-e-nihāñ hotā hai

sho.ala detā hai to kuchh aur dhuāñ hotā hai

na.ara-e-haq ko dabāte haiñ khulī bazm meñ jab

ye kisī gosha-e-zindāñ meñ javāñ hotā hai

kaun patthar hai guhar kaun parakhne kī hai baat

dekhne hī se ye andāza kahāñ hotā hai

ishq meñ shukr-o-shikāyat meñ koī farq nahīñ

apnā apnā alag andāz-e-bayāñ hotā hai

maiñ bhī insāf kā ḳhvāhāñ huuñ magar ai mālik

terī duniyā meñ ab insāf kahāñ hotā hai

kaun sā hai ye mohabbat meñ maqām ai 'mullā'

kalma-e-lutf bhī ab dil pe garāñ hotā hai

gham-e-insan se jo dil shoala-ba-jaan hota hai

wahi har daur mein memar-e-jahan hota hai

dil mein rahraw ke agar azm-e-jawan hota hai

gam bhaTka bhi to manzil ka nishan hota hai

honT sine se siwa soz-e-nihan hota hai

shoala deta hai to kuchh aur dhuan hota hai

nara-e-haq ko dabaate hain khuli bazm mein jab

ye kisi gosha-e-zindan mein jawan hota hai

kaun patthar hai guhar kaun parakhne ki hai baat

dekhne hi se ye andaza kahan hota hai

ishq mein shukr-o-shikayat mein koi farq nahin

apna apna alag andaz-e-bayan hota hai

main bhi insaf ka KHwahan hun magar ai malik

teri duniya mein ab insaf kahan hota hai

kaun sa hai ye mohabbat mein maqam ai 'mulla'

kalma-e-lutf bhi ab dil pe garan hota hai