غم جاناں غم دوراں میں نہاں ہے کہ نہیں

غم جاناں غم دوراں میں نہاں ہے کہ نہیں

میرا افسانہ حدیث دگراں ہے کہ نہیں

ایک مدت سے نہیں کچھ خبر آوارہ

دیکھو دیوانہ سر کوئے بتاں ہے کہ نہیں

یارو انصاف کرو کچھ تو خدا لگتی کہو

بولو وہ شوخ مرا جان جہاں ہے کہ نہیں

کل کی ہے بات کہ سائے کی طرح ساتھ تھے جو

آج سایہ بھی مرا ان کو گراں ہے کہ نہیں

میرے مرنے پہ وہ تڑپے تو تعجب کیوں ہے

شعلہ شمع سر بزم تپاں ہے کہ نہیں

دل بے خود تری باتوں پہ ہنسی آتی ہے

تیرا افسانہ فقط وہم و گماں ہے کہ نہیں

غم جاناں کا مداوا تو میسر نہ ہوا

کچھ علاج غم دوراں بھی یہاں ہے کہ نہیں

آپ ہی آپ یہ دل چور ہوا جاتا ہے

کچھ علاج اس کا بھی اے شیشہ گراں ہے کہ نہیں

آنکھ ملتے ہی شگفتہ ہوا روئے زیبا

کہئے یہ معجزۂ خوش نظراں ہے کہ نہیں

ہم نہ کہتے تھے کہ اب بنت عنب کہ چھوڑو

ایک ہنگامہ سر رطل گراں ہے کہ نہیں

ہم ہتھیلی پہ لئے سر کو یہاں آئے ہیں

تاک میں اس کی کوئی دشمن جاں ہے کہ نہیں

کیوں ہوا جاتا ہے پردے سے تو باہر نقویؔ

سوچ تو خلوتیٔ راز نہاں ہے کہ نہیں