gham-e-jaanan gham-e-dauran mein nihan hai ki nahin

ġham-e-jānāñ ġham-e-daurāñ meñ nihāñ hai ki nahīñ

merā afsāna hadīs-e-digarāñ hai ki nahīñ

ek muddat se nahīñ kuchh ḳhabar-e-āvāra

dekho dīvāna sar-e-kū-e-butāñ hai ki nahīñ

yaaro insāf karo kuchh to ḳhudā lagtī kaho

bolo vo shoḳh mirā jān-e-jahāñ hai ki nahīñ

kal kī hai baat ki saa.e kī tarah saath the jo

aaj saaya bhī mirā un ko girāñ hai ki nahīñ

mere marne pe vo taḌpe to ta.ajjub kyoñ hai

sho.ala-e-sham.a sar-e-bazm tapāñ hai ki nahīñ

dil-e-be-ḳhud tirī bātoñ pe hañsī aatī hai

terā afsāna faqat vahm-o-gumāñ hai ki nahīñ

ġham-e-jānāñ kā mudāvā to mayassar na huā

kuchh ilāj-e-ġham-e-daurāñ bhī yahāñ hai ki nahīñ

aap hī aap ye dil chuur huā jaatā hai

kuchh ilaaj is kā bhī ai shīsha-garāñ hai ki nahīñ

aañkh milte hī shagufta huā rū-e-zebā

kahiye ye mo.ajiza-e-ḳhush-nazrāñ hai ki nahīñ

ham na kahte the ki ab bint-e-inab ki chhoḌo

ek hangāma sar-e-ritl-e-girāñ hai ki nahīñ

ham hathelī pe liye sar ko yahāñ aa.e haiñ

taak meñ us kī koī dushman-e-jāñ hai ki nahīñ

kyoñ huā jaatā hai parde se tū bāhar 'naqvī'

soch to ḳhalvatī-e-rāz-e-nihāñ hai ki nahīñ

gham-e-jaanan gham-e-dauran mein nihan hai ki nahin

mera afsana hadis-e-digaran hai ki nahin

ek muddat se nahin kuchh KHabar-e-awara

dekho diwana sar-e-ku-e-butan hai ki nahin

yaro insaf karo kuchh to KHuda lagti kaho

bolo wo shoKH mera jaan-e-jahan hai ki nahin

kal ki hai baat ki sae ki tarah sath the jo

aaj saya bhi mera un ko giran hai ki nahin

mere marne pe wo taDpe to tajjub kyon hai

shoala-e-shama sar-e-bazm tapan hai ki nahin

dil-e-be-KHud teri baaton pe hansi aati hai

tera afsana faqat wahm-o-guman hai ki nahin

gham-e-jaanan ka mudawa to mayassar na hua

kuchh ilaj-e-gham-e-dauran bhi yahan hai ki nahin

aap hi aap ye dil chur hua jata hai

kuchh ilaj is ka bhi ai shisha-garan hai ki nahin

aankh milte hi shagufta hua ru-e-zeba

kahiye ye moajiza-e-KHush-nazran hai ki nahin

hum na kahte the ki ab bint-e-inab ki chhoDo

ek hangama sar-e-ritl-e-giran hai ki nahin

hum hatheli pe liye sar ko yahan aae hain

tak mein us ki koi dushman-e-jaan hai ki nahin

kyon hua jata hai parde se tu bahar 'naqwi'

soch to KHalwati-e-raaz-e-nihan hai ki nahin