gham-e-jaanan mein samo kar gham-e-dauran humne

ġham-e-jānāñ meñ samo kar ġham-e-daurāñ ham ne

do fasānoñ ko diyā ek hī 'unvāñ ham ne

ġham se ghabrā ke jo kī koshish-e-darmāñ ham ne

aur bhī kāñToñ meñ uljhā liyā dāmāñ ham ne

dekheñ kyā hotā hai tajdīd-e-nasheman kā samāñ

muntaḳhab kī hai phir ik shāḳh-e-gulsitāñ ham ne

ġham se bachne ke liye vaz' kiye the jo usuul

kar diye nāzukī-e-vaqt pe qurbāñ ham ne

aaj 'muḳhtār' asīr-e-ġham-e-daurāñ hai vo dil

jis ko samjhā thā harīf-e-ġham-e-daurāñ ham ne

gham-e-jaanan mein samo kar gham-e-dauran hum ne

do fasanon ko diya ek hi 'unwan hum ne

gham se ghabra ke jo ki koshish-e-darman hum ne

aur bhi kanTon mein uljha liya daman hum ne

dekhen kya hota hai tajdid-e-nasheman ka saman

muntaKHab ki hai phir ek shaKH-e-gulsitan hum ne

gham se bachne ke liye waz' kiye the jo usul

kar diye nazuki-e-waqt pe qurban hum ne

aaj 'muKHtar' asir-e-gham-e-dauran hai wo dil

jis ko samjha tha harif-e-gham-e-dauran hum ne