gham-e-jaanan se rangin aur koi gham nahin hota

ġham-e-jānāñ se rañgīñ aur koī ġham nahīñ hotā

ki is ke dard meñ ehsās-e-besh-o-kam nahīñ hotā

vo haiñ kam-zarf jin kā shor-e-nāla kam nahīñ hotā

chaman meñ phuul bhī to haiñ unheñ kyā ġham nahīñ hotā

kamāl-e-zabt-e-girya azmat-e-shān-e-mohabbat hai

chhalak jaa.e jo paimāna vo jām-e-jam nahīñ hotā

yahāñ tak dil ko aadat ho ga.ī hai be-qarārī kī

sukūn-e-zindagī meñ bhī taḌapnā kam nahīñ hotā

tumhārī yaad hī ke saath dhaḌkan baḌh ga.ī dil kī

tasavvur se mizāj-e-husn to barham nahīñ hotā

ḳhizāñ kī uljhaneñ gulchīñ kā khaTkā hai magar phir bhī

kalī kā baaġh meñ lutf-e-tabassum kam nahīñ hotā

kuchh aisī baat hai sayyād jo ham muskurāte haiñ

nahīñ to āshiyāñ luTne kā kis ko ġham nahīñ hotā

na jaane kyuuñ tumhāre ġham ko duniyā ġham samajhtī hai

masarrat se to is kā martaba kuchh kam nahīñ hotā

'figār' is gulshan-e-hastī kā ibrat-ḳhez aalam hai

ki shabnam ro rahī hai gul kā hañsnā kam nahīñ hotā

gham-e-jaanan se rangin aur koi gham nahin hota

ki is ke dard mein ehsas-e-besh-o-kam nahin hota

wo hain kam-zarf jin ka shor-e-nala kam nahin hota

chaman mein phul bhi to hain unhen kya gham nahin hota

kamal-e-zabt-e-girya azmat-e-shan-e-mohabbat hai

chhalak jae jo paimana wo jam-e-jam nahin hota

yahan tak dil ko aadat ho gai hai be-qarari ki

sukun-e-zindagi mein bhi taDapna kam nahin hota

tumhaari yaad hi ke sath dhaDkan baDh gai dil ki

tasawwur se mizaj-e-husn to barham nahin hota

KHizan ki uljhanen gulchin ka khaTka hai magar phir bhi

kali ka bagh mein lutf-e-tabassum kam nahin hota

kuchh aisi baat hai sayyaad jo hum muskuraate hain

nahin to aashiyan luTne ka kis ko gham nahin hota

na jaane kyun tumhaare gham ko duniya gham samajhti hai

masarrat se to is ka martaba kuchh kam nahin hota

'figar' is gulshan-e-hasti ka ibrat-KHez aalam hai

ki shabnam ro rahi hai gul ka hansna kam nahin hota