gham-e-jahan se main ukta gaya to kya hoga

ġham-e-jahāñ se maiñ uktā gayā to kyā hogā

ḳhud apnī fikr meñ ghulne lagā to kyā hogā

ye nā-guzīr hai ummīd kī numū ke liye

guzartā vaqt kahīñ tham gayā to kyā hogā

yahī bahut hai ki ham ko sukūñ se jiine de

kisī ke hāthoñ hamārā bhalā to kyā hogā

ye log merī ḳhamoshī pe mujh se nālāñ haiñ

koī ye pūchhe maiñ goyā huā to kyā hogā

maiñ is liye bhī bahut muḳhtalif huuñ logoñ se

vo sochte haiñ ki aisā huā to kyā hogā

junūñ kī raah ajab hai ki paañv dharne ko

zamīn tak bhī nahīñ naqsh-e-pā to kyā hogā

ye ek ḳhauf bhī merī ḳhushī meñ shāmil hai

tirā bhī dhyān agar haT gayā to kyā hogā

jo ho rahā hai vo hotā chalā gayā to phir?

jo hone ko hai vahī ho gayā to kyā hogā

gham-e-jahan se main ukta gaya to kya hoga

KHud apni fikr mein ghulne laga to kya hoga

ye na-guzir hai ummid ki numu ke liye

guzarta waqt kahin tham gaya to kya hoga

yahi bahut hai ki hum ko sukun se jine de

kisi ke hathon hamara bhala to kya hoga

ye log meri KHamoshi pe mujh se nalan hain

koi ye puchhe main goya hua to kya hoga

main is liye bhi bahut muKHtalif hun logon se

wo sochte hain ki aisa hua to kya hoga

junun ki rah ajab hai ki panw dharne ko

zamin tak bhi nahin naqsh-e-pa to kya hoga

ye ek KHauf bhi meri KHushi mein shamil hai

tera bhi dhyan agar haT gaya to kya hoga

jo ho raha hai wo hota chala gaya to phir?

jo hone ko hai wahi ho gaya to kya hoga