gham-e-kaun-o-makan hai aur main hun

ġham-e-kaun-o-makāñ hai aur maiñ huuñ

nishāt-e-jāvedāñ hai aur maiñ huuñ

qafas meñ bhī maze meñ kaT rahī hai

ḳhayāl-e-āshiyāñ hai aur maiñ huuñ

kahāñ kā rāhbar aur kaisī manzil

ġhubār-e-kārvāñ hai aur maiñ huuñ

chaman hai fasl-e-gul hai chāñdnī hai

hadīs-e-dil-barāñ hai aur maiñ huuñ

ma.āl-e-imtihāñ kyā jaane kyā ho

musalsal imtihāñ hai aur maiñ huuñ

nigāh-e-barq hai aur āshiyāñ hai

nigāh-e-bāġhbāñ hai aur maiñ huuñ

'sa.īd' ab kaam kyā dair-o-haram se

dar-e-pīr-e-muġhāñ hai aur maiñ huuñ

gham-e-kaun-o-makan hai aur main hun

nishat-e-jawedan hai aur main hun

qafas mein bhi maze mein kaT rahi hai

KHayal-e-ashiyan hai aur main hun

kahan ka rahbar aur kaisi manzil

ghubar-e-karwan hai aur main hun

chaman hai fasl-e-gul hai chandni hai

hadis-e-dil-baran hai aur main hun

maal-e-imtihan kya jaane kya ho

musalsal imtihan hai aur main hun

nigah-e-barq hai aur aashiyan hai

nigah-e-baghban hai aur main hun

'said' ab kaam kya dair-o-haram se

dar-e-pir-e-mughan hai aur main hun