gham-e-mazi gham-e-hazir gham-e-farda ke siwa

ġham-e-māzī ġham-e-hāzir ġham-e-fardā ke sivā

zindagī kuchh bhī nahīñ ḳhūn-e-tamannā ke sivā

dekhte dekhte hī naav kahāñ Duub ga.ī

kis ko ma.alūm hai tuġhyānī-e-dariyā ke sivā

un se rūdād-e-sitam kahiye to kyuuñ kar kahiye

jin ko kuchh yaad nahīñ shikva-e-bejā ke sivā

mere is hāl-e-pareshāñ kī ḳhabar kis ko nahīñ

sab pe zāhir hai haqīqat ye masīhā ke sivā

mushkileñ TuuT paḌīñ jab bhī havādis kī tarah

koī apnā na huā ik dil-e-tanhā ke sivā

paañv meñ jitne bhī chhāle the sabhī phuuT paḌe

koī samjhā na mire dard ko sahrā ke sivā

'arsh' kal raat jo mahfil meñ hue hañgāme

jāntā kaun hai vo sāġhar-o-sahbā ke sivā

gham-e-mazi gham-e-hazir gham-e-farda ke siwa

zindagi kuchh bhi nahin KHun-e-tamanna ke siwa

dekhte dekhte hi naw kahan Dub gai

kis ko malum hai tughyani-e-dariya ke siwa

un se rudad-e-sitam kahiye to kyun kar kahiye

jin ko kuchh yaad nahin shikwa-e-beja ke siwa

mere is haal-e-pareshan ki KHabar kis ko nahin

sab pe zahir hai haqiqat ye masiha ke siwa

mushkilen TuT paDin jab bhi hawadis ki tarah

koi apna na hua ek dil-e-tanha ke siwa

panw mein jitne bhi chhaale the sabhi phuT paDe

koi samjha na mere dard ko sahra ke siwa

'arsh' kal raat jo mahfil mein hue hangame

jaanta kaun hai wo saghar-o-sahba ke siwa