غم قسمت غم دنیا غم جاناں لے کر

غم قسمت غم دنیا غم جاناں لے کر

پھر رہا ہوں میں زمانے میں یہ ساماں لے کر

آج نکلے ہیں سنور کر وہ خدا خیر کرے

حسن کی ڈھال لئے چشم کی پیکاں لے کر

ہے مرا دعویٰ نہیں پاؤ گے مجھ سا کوئی

ڈھونڈھنے نکلو گے گر شمع فروزاں لے کر

کیا کہوں حسن شب وصل بس اتنا سمجھو

ایک بجلی تھی مگر صورت انساں لے کر

جانے کس بات پہ بے ساختہ ہو کر برہم

اٹھ گئے بزم سے وہ حلقۂ یاراں لے کر

جانے کیا کیا تھے ارادے مرے دل میں لیکن

رہ گیا یوں ہی مگر حسرت و ارماں لے کر

لاکھ نظروں میں بسا لیں کہ سمو لیں دل میں

وہ نکل جاتے ہیں چپکے سے دل و جاں لے کر

جب سنائی نہ دے بلبل کا ترانہ انجمؔ

کیا کریں گے گل و گلزار و گلستاں لے کر