gham-e-qismat gham-e-duniya gham-e-jaanan le kar

ġham-e-qismat ġham-e-duniyā ġham-e-jānāñ le kar

phir rahā huuñ maiñ zamāne meñ ye sāmāñ le kar

aaj nikle haiñ sañvar kar vo ḳhudā ḳhair kare

husn kī Dhaal liye chashm kī paikāñ le kar

hai mirā da.avā nahīñ pāoge mujh sā koī

DhūñDhne nikloge gar sham-e-farozāñ le kar

kyā kahūñ husn-e-shab-e-vasl bas itnā samjho

ek bijlī thī magar sūrat-e-insāñ le kar

jaane kis baat pe be-sāḳhta ho kar barham

uTh ga.e bazm se vo halqa-e-yārāñ le kar

jaane kyā kyā the irāde mire dil meñ lekin

rah gayā yuñhī magar hasrat-o-armāñ le kar

laakh nazroñ meñ basā leñ ki samo leñ dil meñ

vo nikal jaate haiñ chupke se dil-o-jāñ le kar

jab sunā.ī na de bulbul kā tarāna 'anjum'

kyā kareñge gul-o-gulzār-o-gulistāñ le kar

gham-e-qismat gham-e-duniya gham-e-jaanan le kar

phir raha hun main zamane mein ye saman le kar

aaj nikle hain sanwar kar wo KHuda KHair kare

husn ki Dhaal liye chashm ki paikan le kar

hai mera dawa nahin paoge mujh sa koi

DhunDhne nikloge gar sham-e-farozan le kar

kya kahun husn-e-shab-e-wasl bas itna samjho

ek bijli thi magar surat-e-insan le kar

jaane kis baat pe be-saKHta ho kar barham

uTh gae bazm se wo halqa-e-yaran le kar

jaane kya kya the irade mere dil mein lekin

rah gaya yunhi magar hasrat-o-arman le kar

lakh nazron mein basa len ki samo len dil mein

wo nikal jate hain chupke se dil-o-jaan le kar

jab sunai na de bulbul ka tarana 'anjum'

kya karenge gul-o-gulzar-o-gulistan le kar