gham-e-sud-o-ziyan se KHud ko jo aazad rakhta hai

ġham-e-sūd-o-ziyāñ se ḳhud ko jo āzād rakhtā hai

koī mausam bhī ho dil ko hamesha shaad rakhtā hai

koī bhī haal ho shikve gile kartā hai jo sab se

kabhī hoñToñ pe naale aur kabhī fariyād rakhtā hai

zarā sī chuuk par tanqīd kī qaiñchī chalāne ko

mire sheroñ pe nazreñ gaaḌ ke naqqād rakhtā hai

kisī pyāse ko paanī se kabhī mahrūm mat karnā

ye aisā kaam hai jis ko faqat jallād kartā hai

mayassar hai sukūn-e-dil kī daulat us ko duniyā meñ

ḳhudā kī yaad se jo apnā dil ābād rakhtā hai

lagā dete haiñ baazī jaan kī jo haq-parastī meñ

zamāna aise logoñ ko hamesha yaad rakhtā hai

abhī jo sang-bārī ho rahī hai vaqt ke hāthoñ

'sa.īd' is vāste apnā jigar faulād rakhtā hai

gham-e-sud-o-ziyan se KHud ko jo aazad rakhta hai

koi mausam bhi ho dil ko hamesha shad rakhta hai

koi bhi haal ho shikwe gile karta hai jo sab se

kabhi honTon pe nale aur kabhi fariyaad rakhta hai

zara si chuk par tanqid ki qainchi chalane ko

mere sheron pe nazren gaD ke naqqad rakhta hai

kisi pyase ko pani se kabhi mahrum mat karna

ye aisa kaam hai jis ko faqat jallad karta hai

mayassar hai sukun-e-dil ki daulat us ko duniya mein

KHuda ki yaad se jo apna dil aabaad rakhta hai

laga dete hain bazi jaan ki jo haq-parasti mein

zamana aise logon ko hamesha yaad rakhta hai

abhi jo sang-bari ho rahi hai waqt ke hathon

'said' is waste apna jigar faulad rakhta hai