gham-e-ulfat ke manazir bhi hain pyare kitne

ġham-e-ulfat ke manāzir bhī haiñ pyāre kitne

ashk Tapke to bane chāñd sitāre kitne

umr bhar TuuTe haiñ bañdh bañdh ke sahāre kitne

kaam aate rahe hamdard hamāre kitne

yahī jiinā hai to phir maut kise kahte haiñ

jī rahe haiñ ġham-o-andoh ke maare kitne

yuuñ to kahne ko bahār aatī rahī jaatī rahī

koī pūchhe ki chaman us ne sañvāre kitne

inqalāb aane ko duniyā meñ hai aa jaane do

phir ubharne ko haiñ Duube hue taare kitne

maiñ abhī kah duuñ to kaunain meñ halchal paḌ jaa.e

haiñ mirī chashm-e-tasavvur meñ nazāre kitne

maut aur ziist ke khāyā kiye kyā kyā na fareb

zindagī ke the ye dilchasp nazāre kitne

zarf darkār hai ai dost mohabbat ke liye

kar liye dil hī ne ḳhud jazb sharāre kitne

kaash hotā koī mahfil meñ samajhne vaalā

the latīf un kī nigāhoñ ke ishāre kitne

ho mubārak tumheñ sair-e-mah-o-anjum lekin

is meñ haiñ aah ġharībāñ ke sharāre kitne

mo'tarif ham bhī haiñ 'muslim' kī ġhazal-goī ke

saaf bandish hai mazāmīn haiñ pyāre kitne

gham-e-ulfat ke manazir bhi hain pyare kitne

ashk Tapke to bane chand sitare kitne

umr bhar TuTe hain bandh bandh ke sahaare kitne

kaam aate rahe hamdard hamare kitne

yahi jina hai to phir maut kise kahte hain

ji rahe hain gham-o-andoh ke mare kitne

yun to kahne ko bahaar aati rahi jati rahi

koi puchhe ki chaman us ne sanware kitne

inqalab aane ko duniya mein hai aa jaane do

phir ubharne ko hain Dube hue tare kitne

main abhi kah dun to kaunain mein halchal paD jae

hain meri chashm-e-tasawwur mein nazare kitne

maut aur zist ke khaya kiye kya kya na fareb

zindagi ke the ye dilchasp nazare kitne

zarf darkar hai ai dost mohabbat ke liye

kar liye dil hi ne KHud jazb sharare kitne

kash hota koi mahfil mein samajhne wala

the latif un ki nigahon ke ishaare kitne

ho mubarak tumhein sair-e-mah-o-anjum lekin

is mein hain aah ghariban ke sharare kitne

mo'tarif hum bhi hain 'muslim' ki ghazal-goi ke

saf bandish hai mazamin hain pyare kitne