gham-e-ulfat mein Dube the ubharna bhi zaruri tha

ġham-e-ulfat meñ Duube the ubharnā bhī zarūrī thā

hameñ rāh-e-mohabbat se guzarnā bhī zarūrī thā

haqīqat sāmne aa.ī bahut hairat huī mujh ko

tire chehre se parde kā utarnā bhī zarūrī thā

hameñ manzil ko paanā thā tabhī to rāh-e-hastī meñ

hameñ pathrīle rastoñ se guzarnā bhī zarūrī thā

luTāte hī rahe jo kuchh bhī apne paas thā yaaro

ki ḳhushbū kī tarah apnā bikharnā bhī zarūrī thā

hameñ vo bhuul baiThe haiñ unheñ phir yaad kyā karnā

unheñ rāh-e-mohabbat meñ bisarnā bhī zarūrī thā

hamārī zindagī meñ hādse hote rahe 'ambar'

unheñ sahte hue apnā nikharnā bhī zarūrī thā

gham-e-ulfat mein Dube the ubharna bhi zaruri tha

hamein rah-e-mohabbat se guzarna bhi zaruri tha

haqiqat samne aai bahut hairat hui mujh ko

tere chehre se parde ka utarna bhi zaruri tha

hamein manzil ko pana tha tabhi to rah-e-hasti mein

hamein pathrile raston se guzarna bhi zaruri tha

luTate hi rahe jo kuchh bhi apne pas tha yaro

ki KHushbu ki tarah apna bikharna bhi zaruri tha

hamein wo bhul baiThe hain unhen phir yaad kya karna

unhen rah-e-mohabbat mein bisarna bhi zaruri tha

hamari zindagi mein hadse hote rahe 'ambar'

unhen sahte hue apna nikharna bhi zaruri tha