gham-e-zamana nahin ek azab hai saqi

ġham-e-zamāna nahīñ ik azaab hai saaqī

sharāb lā mirī hālat ḳharāb hai saaqī

shabāb ke liye tauba azaab hai saaqī

sharāb lā mujhe pās-e-shabāb hai saaqī

uThā piyāla ki gulshan pe phir barasne lagī

vo mai ki jis kā qadah māhtāb hai saaqī

nikāl parda-e-mīnā se duḳhtar-e-raz ko

ghaTā meñ kis liye ye māhtāb hai saaqī

tū vā.izoñ kī na sun mai-kashoñ kī ḳhidmat kar

gunah savāb kī ḳhātir savāb hai saaqī

zamāne-bhar ke ġhamoñ ko hai dāvat-e-ġharrā

ki ek jaam meñ sab kā javāb hai saaqī

kalām jis kā hai me.arāj 'hāfiz'-o-'ḳhayyām'

yahī vo 'aḳhtar'-e-ḳhāna-ḳharāb hai saaqī

gham-e-zamana nahin ek azab hai saqi

sharab la meri haalat KHarab hai saqi

shabab ke liye tauba azab hai saqi

sharab la mujhe pas-e-shabab hai saqi

uTha piyala ki gulshan pe phir barasne lagi

wo mai ki jis ka qadah mahtab hai saqi

nikal parda-e-mina se duKHtar-e-raz ko

ghaTa mein kis liye ye mahtab hai saqi

tu waizon ki na sun mai-kashon ki KHidmat kar

gunah sawab ki KHatir sawab hai saqi

zamane-bhar ke ghamon ko hai dawat-e-gharra

ki ek jam mein sab ka jawab hai saqi

kalam jis ka hai mearaj 'hafiz'-o-'KHayyam'

yahi wo 'aKHtar'-e-KHana-KHarab hai saqi