gham-e-zindagi tere roz-o-shab se hai silsila nai dhup ka

ġham-e-zindagī tire roz-o-shab se hai silsila na.ī dhuup kā

tujhe ho ḳhabar mire dard se bhī hai rābta na.ī dhuup kā

mirī manziloñ ko ḳhabar karo unheñ raushnī kī naved ho

mire dar pe aa ke banā gayā koī rāsta na.ī dhuup kā

shab-e-intizār ajiib thī mirī raat āñkhoñ meñ kaT ga.ī

sar-e-shām kaun ye de gayā mujhe indiya na.ī dhuup kā

ye jo husn-o-ishq kā raaz hai ye nigāh-e-rab kā majāz hai

koī muntazir ghanī chhāñv kā koī mubtalā na.ī dhuup kā

koī chaap uThī na koī sadā koī ḳhāmushī se palaT gayā

mire ghar ke aage rukā to thā koī qāfila na.ī dhuup kā

mere sahn meñ jo daraḳht hai use tā.eroñ se bhī rabt hai

vahīñ surma.ī se paroñ ke biich vo tahlaka na.ī dhuup kā

ye jo Daalī Daalī sañvar ga.ī koī badlī khul ke baras ga.ī

hai tabhī se dekho ajiib sā nayā tantana na.ī dhuup kā

chalo ġhāza vaqt kā chal gayā koī shaam chehre pe mal gayā

mirī albumoñ meñ kahīñ kahīñ koī zikr thā na.ī dhuup kā

mujhe pichhlī shab kī ḳhunuk ravī ne hī sub.h-dam ye shunīd dī

maiñ dhanak kī oḌh ke oḌhnī karūñ nāshta na.ī dhuup kā

mire bām-o-dil ko sajā.egī ki ye kore ḳhvāb jalā.egī

chalo aaj 'sīmā' isī pe ham kareñ tasfiya na.ī dhuup kā

gham-e-zindagi tere roz-o-shab se hai silsila nai dhup ka

tujhe ho KHabar mere dard se bhi hai rabta nai dhup ka

meri manzilon ko KHabar karo unhen raushni ki nawed ho

mere dar pe aa ke bana gaya koi rasta nai dhup ka

shab-e-intizar ajib thi meri raat aankhon mein kaT gai

sar-e-sham kaun ye de gaya mujhe indiya nai dhup ka

ye jo husn-o-ishq ka raaz hai ye nigah-e-rab ka majaz hai

koi muntazir ghani chhanw ka koi mubtala nai dhup ka

koi chap uThi na koi sada koi KHamushi se palaT gaya

mere ghar ke aage ruka to tha koi qafila nai dhup ka

mere sahn mein jo daraKHt hai use taeron se bhi rabt hai

wahin surmai se paron ke bich wo tahlaka nai dhup ka

ye jo Dali Dali sanwar gai koi badli khul ke baras gai

hai tabhi se dekho ajib sa naya tantana nai dhup ka

chalo ghaza waqt ka chal gaya koi sham chehre pe mal gaya

meri albumon mein kahin kahin koi zikr tha nai dhup ka

mujhe pichhli shab ki KHunuk rawi ne hi subh-dam ye shunid di

main dhanak ki oDh ke oDhni karun nashta nai dhup ka

mere baam-o-dil ko sajaegi ki ye kore KHwab jalaegi

chalo aaj 'sima' isi pe hum karen tasfiya nai dhup ka