gum hue jate hain dhaDkan ke nishan ham-nafaso

gum hue jaate haiñ dhaḌkan ke nishāñ ham-nafaso

hai dar-e-dil pe koī sañg-e-girāñ ham-nafaso

risne lagtī haiñ jab āñkhoñ se tezābī yādeñ

baat karte hue jaltī hai zabāñ ham-nafaso

dil se lab tak koī kohrām sā sannāTā hai

ḳhud-kalāmī mujhe le aa.ī kahāñ ham-nafaso

ik subuk mauj hai ik lauh-e-daraḳhshāñ pe ravāñ

hai tamāshā.ī yahāñ saarā jahāñ ham-nafaso

kitne masrūf haiñ masrūr nahīñ phir bhī ye log

hai ye kyā silsila-e-kār-e-ziyāñ ham-nafaso

shaam tamhīd-e-ġhazal raat hai takmīl-e-ġhazal

din nikalte hī nikal jaatī hai jaañ ham-nafaso

rashk-e-mahshar koī qāmat to nigāhoñ meñ jache

dil meñ baaqī hai abhī tāb-o-tavāñ ham-nafaso

zinda ho rasm-e-junūñ kis kī navā-rezī se

ab rahā kaun yahāñ sho.ala-ba-jāñ ham-nafaso

aaj kī shaam ġhazal kyuuñ na 'ḳhalish' se hī suneñ

DhūñD kar laa.e koī hai vo kahāñ ham-nafaso

gum hue jate hain dhaDkan ke nishan ham-nafaso

hai dar-e-dil pe koi sang-e-giran ham-nafaso

risne lagti hain jab aankhon se tezabi yaaden

baat karte hue jalti hai zaban ham-nafaso

dil se lab tak koi kohram sa sannaTa hai

KHud-kalami mujhe le aai kahan ham-nafaso

ek subuk mauj hai ek lauh-e-daraKHshan pe rawan

hai tamashai yahan sara jahan ham-nafaso

kitne masruf hain masrur nahin phir bhi ye log

hai ye kya silsila-e-kar-e-ziyan ham-nafaso

sham tamhid-e-ghazal raat hai takmil-e-ghazal

din nikalte hi nikal jati hai jaan ham-nafaso

rashk-e-mahshar koi qamat to nigahon mein jache

dil mein baqi hai abhi tab-o-tawan ham-nafaso

zinda ho rasm-e-junun kis ki nawa-rezi se

ab raha kaun yahan shoala-ba-jaan ham-nafaso

aaj ki sham ghazal kyun na 'KHalish' se hi sunen

DhunD kar lae koi hai wo kahan ham-nafaso