gham ka dariya sukh na jae uski rawani kam na paDe

ġham kā dariyā suukh na jaa.e us kī ravānī kam na paḌe

ḳhūn-e-jigar bhī shāmil kar luuñ aañkh meñ paanī kam na paḌe

us ke badan kī ḳhushbū kā kuchh toḌ nikālo aaj kī raat

aur koī ḳhushbū le aao rāt-kī-rānī kam na paḌe

sāl-do-sāl kī baat nahīñ hai umr bahut darkār hai haañ

soch rahā huuñ ishq kī ḳhātir ahd-e-javānī kam paḌe

ā.īne kā dil nahīñ TuuTe us kā bharam ābād rahe

chehre par kuchh aur baḌhāo ye hairānī kam na paḌe

kār-e-jahāñ meñ apnī vus.at se ye ḳhud hairān sā hai

ādam-zād ko mere maulā ālam-e-fānī kam na paḌe

dard ke saare hī qissoñ kī yād-dahānī kar lenā

hijr kī raat bahut lambī hai ek kahānī kam na paḌe

raaz bahut se aise bhī haiñ jo us ko ma.alūm nahīñ

mere yaar kī sohbat tujh ko dushman-e-jānī kam na paḌe

gham ka dariya sukh na jae us ki rawani kam na paDe

KHun-e-jigar bhi shamil kar lun aankh mein pani kam na paDe

us ke badan ki KHushbu ka kuchh toD nikalo aaj ki raat

aur koi KHushbu le aao raat-ki-rani kam na paDe

sal-do-sal ki baat nahin hai umr bahut darkar hai han

soch raha hun ishq ki KHatir ahd-e-jawani kam paDe

aaine ka dil nahin TuTe us ka bharam aabaad rahe

chehre par kuchh aur baDhao ye hairani kam na paDe

kar-e-jahan mein apni wusat se ye KHud hairan sa hai

aadam-zad ko mere maula aalam-e-fani kam na paDe

dard ke sare hi qisson ki yaad-dahani kar lena

hijr ki raat bahut lambi hai ek kahani kam na paDe

raaz bahut se aise bhi hain jo us ko malum nahin

mere yar ki sohbat tujh ko dushman-e-jaani kam na paDe