gham ka iblagh ba-ehsas-e-tarab chahti hai

ġham kā iblāġh ba-ehsās-e-tarab chāhtī hai

baat vo hai ki adā hone ko Dhab chāhtī hai

ek to paas mire dirham-o-dīñ kuchh bhī nahīñ

dūsrā shūmī-e-qismat ki vo sab chāhtī hai

maiñ ki huuñ mausam-e-gul hujjat-e-zanjīr-ba-pā

vo to ḳhushbū hai chalī aatī hai jab chāhtī hai

kis ke aañsū haiñ jo āñkhoñ kī rasad chāhte haiñ

baat sī jī meñ ye kis ke hai jo lab chāhtī hai

maiñ bhaTak kar bhī tire ḳhvāb meñ aaya na kabhī

aur kyā mujh se tirī ḳhalvat-e-shab chāhtī hai

maiñ na kahtā thā ki itnā na karā kasb-e-junūñ

tujhe rone ko bhī ab aañkh sabab chāhtī hai

gham ka iblagh ba-ehsas-e-tarab chahti hai

baat wo hai ki ada hone ko Dhab chahti hai

ek to pas mere dirham-o-din kuchh bhi nahin

dusra shumi-e-qismat ki wo sab chahti hai

main ki hun mausam-e-gul hujjat-e-zanjir-ba-pa

wo to KHushbu hai chali aati hai jab chahti hai

kis ke aansu hain jo aankhon ki rasad chahte hain

baat si ji mein ye kis ke hai jo lab chahti hai

main bhaTak kar bhi tere KHwab mein aaya na kabhi

aur kya mujh se teri KHalwat-e-shab chahti hai

main na kahta tha ki itna na kara kasb-e-junun

tujhe rone ko bhi ab aankh sabab chahti hai