غم کے سنسان بیاباں سے نکلتا ہی نہیں

غم کے سنسان بیاباں سے نکلتا ہی نہیں

دل مرا درد کے طوفاں سے سنبھلتا ہی نہیں

عشق کی آتش خاموش ہے کب سے روشن

مگر احساس کا شعلہ ہے کہ جلتا ہی نہیں

ہر طرف دھند ہے اشکوں کی فراوانی سے

دل بیتاب سرابوں سے بہلتا ہی نہیں

تلخیاں اہل زمانہ سے وہ جھیلی ہیں نہ پوچھ

دل مرا فصل بہاراں میں مچلتا ہی نہیں

کب سے حالات زمانہ ہیں دگر گوں لیکن

دل کا موسم کسی حالت میں بدلتا ہی نہیں

کیا کہوں درپئے آزار ہے دنیا شاہینؔ

آدمی قید زمانہ سے نکلتا ہی نہیں