gham ke sunsan bayaban se nikalta hi nahin

ġham ke sunsān bayābāñ se nikaltā hī nahīñ

dil mirā dard ke tūfāñ se sañbhaltā hī nahīñ

'ishq kī ātish-e-ḳhāmosh hai kab se raushan

magar ehsās kā sho'la hai ki jaltā hī nahīñ

har taraf dhund hai ashkoñ kī farāvānī se

dil-e-betāb sarāboñ se bahaltā hī nahīñ

talḳhiyāñ ahl-e-zamāna se vo jhelī haiñ na pūchh

dil mirā fasl-e-bahārāñ meñ machaltā hī nahīñ

kab se hālāt-e-zamāna haiñ digar-gūñ lekin

dil kā mausam kisī hālat meñ badaltā hī nahīñ

kyā kahūñ darpai-e-āzār hai duniyā 'shāhīn'

aadmī qaid-e-zamāna se nikaltā hī nahīñ

gham ke sunsan bayaban se nikalta hi nahin

dil mera dard ke tufan se sanbhalta hi nahin

'ishq ki aatish-e-KHamosh hai kab se raushan

magar ehsas ka sho'la hai ki jalta hi nahin

har taraf dhund hai ashkon ki farawani se

dil-e-betab sarabon se bahalta hi nahin

talKHiyan ahl-e-zamana se wo jheli hain na puchh

dil mera fasl-e-bahaaran mein machalta hi nahin

kab se haalat-e-zamana hain digar-gun lekin

dil ka mausam kisi haalat mein badalta hi nahin

kya kahun darpai-e-azar hai duniya 'shahin'

aadmi qaid-e-zamana se nikalta hi nahin