gham ki andheri raat ki jaane sahar na aae kyon

ġham kī añdherī raat kī jaane sahar na aa.e kyoñ

pahroñ jale kisī kā dil zaḳhm ubhar na aa.e kyoñ

apne parā.e ho ga.e ġhairoñ ne bhī kiyā sitam

aise meñ dardmand dil dard se bhar na aa.e kyoñ

terā hī jab ḳhayāl hai āThoñ pahar dimāġh meñ

jāgte sote har taraf tū hī nazar na aa.e kyoñ

tere binā ab ek pal mujh se rahā na jaa.e hai

DhūñDe tujhe mirī nazar terī ḳhabar na aa.e kyoñ

husn-o-jamāl dil-fareb us pe ye sādgī to dost

aql tirī adāoñ ke zer-e-asar na aa.e kyoñ

sehn-e-chaman meñ vaise to gul haiñ har ek rang ke

tere sivā kisī pe bhī dil ye magar na aa.e kyoñ

ḳhud hī adāvatoñ kā biij boyā hai aap ne to phir

kiina nifāq-o-buġhz kā us meñ samar na aa.e kyoñ

apne karam kī raushnī us ne bikher dī to 'shād'

rang hamāre baḳht kā bolo nikhar na aa.e kyoñ

gham ki andheri raat ki jaane sahar na aae kyon

pahron jale kisi ka dil zaKHm ubhar na aae kyon

apne parae ho gae ghairon ne bhi kiya sitam

aise mein dardmand dil dard se bhar na aae kyon

tera hi jab KHayal hai aaThon pahar dimagh mein

jagte sote har taraf tu hi nazar na aae kyon

tere bina ab ek pal mujh se raha na jae hai

DhunDe tujhe meri nazar teri KHabar na aae kyon

husn-o-jamal dil-fareb us pe ye sadgi to dost

aql teri adaon ke zer-e-asar na aae kyon

sehn-e-chaman mein waise to gul hain har ek rang ke

tere siwa kisi pe bhi dil ye magar na aae kyon

KHud hi adawaton ka bij boya hai aap ne to phir

kina nifaq-o-bughz ka us mein samar na aae kyon

apne karam ki raushni us ne bikher di to 'shad'

rang hamare baKHt ka bolo nikhar na aae kyon