gham ki kali raat ko yun hal kiya

ġham kī kaalī raat ko yuuñ hal kiyā

ham ne āḳhir dard ko kājal kiyā

surma.ī resham pe thā tāroñ kā jaal

kitnā pyārā raat kā āñchal kiyā

mere andar phailtā jaatā thā jo

tai baḌī mushkil se vo jangal kiyā

ham ne yuuñ hañs kar guzārī zindagī

apnī har zanjīr ko paa.el kiyā

rābta ḳhushbū se rakkhā ustuvār

ruuh meñ jaltā huā sandal kiyā

gham ki kali raat ko yun hal kiya

hum ne aaKHir dard ko kajal kiya

surmai resham pe tha taron ka jal

kitna pyara raat ka aanchal kiya

mere andar phailta jata tha jo

tai baDi mushkil se wo jangal kiya

hum ne yun hans kar guzari zindagi

apni har zanjir ko pael kiya

rabta KHushbu se rakkha ustuwar

ruh mein jalta hua sandal kiya