غم کسی کا مٹا کر تو دیکھو

غم کسی کا مٹا کر تو دیکھو

اپنے غم کو بھلا کر تو دیکھو

رنگ چہرے کا ظاہر کرے گا

راز الفت چھپا کر تو دیکھو

تم سے سارا زمانہ جلے گا

نام و شہرت کما کر تو دیکھو

دوست دشمن کی پہچان ہوگی

درد اپنا سنا کر تو دیکھو

اک ذرا مسکراہٹ سے اپنی

رنجشوں کو ہٹا کر تو دیکھو

عیب اوروں کے گننے سے پہلے

خود سے نظریں ملا کر تو دیکھو

بے خودی چیز ہوتی ہے کیسی

دل کسی پر لٹا کر تو دیکھو

لوگ کیسے بدلتے ہیں موناؔ

کوئی رشتہ نبھا کر تو دیکھو