gham ko KHud par sawar mat karna

ġham ko ḳhud par savār mat karnā

zaḳhm ko ishtihār mat karnā

ek had meñ raho to achchhā hai

had kī dīvār paar mat karnā

apnī parvāz bhuul jāoge

ġhair par inhisār mat karnā

sar uThānā muhāl ho jaa.e

ḳhud ko yuuñ zer-e-bār mat karnā

vaqt kab intizār kartā hai

vaqt kā intizār mat karnā

baat karnā to sāmne karnā

piiTh pīchhe se vaar mat karnā

hausle se sahārnā ġham ko

dard ko be-vaqār mat karnā

chāhatoñ ke hisāb meñ 'anvar'

ek pal bhī udhār mat karnā

gham ko KHud par sawar mat karna

zaKHm ko ishtihaar mat karna

ek had mein raho to achchha hai

had ki diwar par mat karna

apni parwaz bhul jaoge

ghair par inhisar mat karna

sar uThana muhaal ho jae

KHud ko yun zer-e-bar mat karna

waqt kab intizar karta hai

waqt ka intizar mat karna

baat karna to samne karna

piTh pichhe se war mat karna

hausle se sahaarna gham ko

dard ko be-waqar mat karna

chahaton ke hisab mein 'anwar'

ek pal bhi udhaar mat karna