غم کو پردے میں مسرت کے چھپا دیتا ہوں میں

غم کو پردے میں مسرت کے چھپا دیتا ہوں میں

آنسو آنکھوں میں جب آئے مسکرا دیتا ہوں میں

زندگی کی راحتیں کیا زندگی تک بھی نثار

یاد جب آتے ہو تم سب کچھ بھلا دیتا ہوں میں

ہاں اسی چپ میں جو بے معنی ہے اوروں کے لئے

کام جس سے ہے اسے سب کچھ سنا دیتا ہوں میں

رونا آتا تھا جب اپنے حال پر وہ دن گئے

اب تو بربادی پہ اپنی مسکرا دیتا ہوں میں

آ گئی اشکوں میں لالی حسرتوں کے خون کی

دل کی جو حالت ہے آنکھوں سے دکھا دیتا ہوں میں

حسن کے دامن پہ آنچ آنے نہیں دیتا کبھی

اپنے دل میں شعلۂ غم کو دبا دیتا ہوں میں

کام کیا زندہ دلی کا مر چکا نوابؔ دل

موت کی نیند آرزوؤں کو سلا دیتا ہوں میں