gham mein har lab pe wahi aah-o-buka aati hai

ġham meñ har lab pe vahī āh-o-bukā aatī hai

muḳhtalif saaz haiñ aur ek sadā aatī hai

ho ke zindāñ se jo gulshan kī havā aatī hai

aur dīvānoñ ko dīvāna banā aatī hai

past hotī hai jahāñ ahl-e-dilā kī himmat

us jagah kaam ġharīboñ kī duā aatī hai

mujh se har haal meñ achchhā hai tasavvur merā

kam se kam aap kī tasvīr banā aatī hai

jab jafāoñ se paḌā kaam to sab bhuul ga.e

naaz thā ham ko ki ham ko bhī vafā aatī hai

dil hai yā sāz-e-shikasta hai na jaane kyā hai

ek se ek ḳhush-ā.ind sadā aatī hai

fursat itnī nahīñ miltī ki kabhī ġhaur kareñ

varna har dard kī ḳhud ham ko davā aatī hai

jām-e-sarshār idhar hai maiñ huuñ tauba hai udhar

aur idhar ka.abe se ik mast ghaTā aatī hai

din nikaltā hai to aatī hai mujhe raat kī yaad

raat aatī hai to ik taaza balā aatī hai

is taraf pā-e-shikasta meñ nahīñ tāb-e-safar

us taraf kaan meñ āvāz-e-darā aatī hai

dil meñ jo aag bhaḌaktī hai bujhātī hai vo aañkh

ḳhuub donoñ ko lagā aur bujhā aatī hai

aap gumrāh hai 'shaukat' mirī vahshat lekin

rāsta bhūlne vāloñ ko batā aatī hai

gham mein har lab pe wahi aah-o-buka aati hai

muKHtalif saz hain aur ek sada aati hai

ho ke zindan se jo gulshan ki hawa aati hai

aur diwanon ko diwana bana aati hai

past hoti hai jahan ahl-e-dila ki himmat

us jagah kaam gharibon ki dua aati hai

mujh se har haal mein achchha hai tasawwur mera

kam se kam aap ki taswir bana aati hai

jab jafaon se paDa kaam to sab bhul gae

naz tha hum ko ki hum ko bhi wafa aati hai

dil hai ya saz-e-shikasta hai na jaane kya hai

ek se ek KHush-aind sada aati hai

fursat itni nahin milti ki kabhi ghaur karen

warna har dard ki KHud hum ko dawa aati hai

jam-e-sarshaar idhar hai main hun tauba hai udhar

aur idhar kabe se ek mast ghaTa aati hai

din nikalta hai to aati hai mujhe raat ki yaad

raat aati hai to ek taza bala aati hai

is taraf pa-e-shikasta mein nahin tab-e-safar

us taraf kan mein aawaz-e-dara aati hai

dil mein jo aag bhaDakti hai bujhati hai wo aankh

KHub donon ko laga aur bujha aati hai

aap gumrah hai 'shaukat' meri wahshat lekin

rasta bhulne walon ko bata aati hai