غم میں جو دوسروں کے روتے ہیں

غم میں جو دوسروں کے روتے ہیں

ایسے انسان کم ہی ہوتے ہیں

شاعری دل کو اور چھوتی ہے

اشکوں میں جب کلام دھوتے ہیں

ہائے دیکھے کوئی کہ نادر شے

کیسے پاتے ہیں کیسے کھوتے ہیں

ساتھ جیتے ہیں حسرتوں کے ہم

یوں ہی ہنستے ہیں یوں ہی روتے ہیں

کوئی تو چارہ گر کو سمجھائے

درد کچھ لا علاج ہوتے ہیں

نطق ہوتی ہے ڈور رشتوں کی

اس میں کیوں خامشی پروتے ہیں

کیوں نہیں وہ ضمیر کی سنتے

بیج جو نفرتوں کے بوتے ہیں

دور حاصلؔ سے جا کے بھی کیوں آپ

اس کے خط اشکوں میں بھگوتے ہیں