gham mein jo masarrat ke pahlu nikal aate hain

ġham meñ jo masarrat ke pahlū nikal aate haiñ

ham laakh chhupāte haiñ aañsū nikal aate haiñ

mī.ād baḌhāte haiñ vo qaid-e-mohabbat kī

ham bach ke asīrān-e-gesū nikal aate haiñ

kyā rahrav-e-hastī ne phir rāh-e-talab kho dī

kyoñ shab ke añdhere meñ jugnū nikal aate haiñ

jab bhī tirī zulfoñ kā charchā kahīñ hotā hai

taḳh.īl ke goshe se bā-mū nikal aate haiñ

kyoñ barbat-e-dil chheḌeñ zaḳhmoñ ke gulistāñ meñ

kyā jāniye kyā guzre jaadū nikal aate haiñ

'sābir' ġham-e-hastī meñ māyūs na ho jaa.eñ

har haal meñ jiine ke pahlū nikal aate haiñ

gham mein jo masarrat ke pahlu nikal aate hain

hum lakh chhupate hain aansu nikal aate hain

miad baDhate hain wo qaid-e-mohabbat ki

hum bach ke asiran-e-gesu nikal aate hain

kya rahraw-e-hasti ne phir rah-e-talab kho di

kyon shab ke andhere mein jugnu nikal aate hain

jab bhi teri zulfon ka charcha kahin hota hai

taKHil ke goshe se ba-mu nikal aate hain

kyon barbat-e-dil chheDen zaKHmon ke gulistan mein

kya jaaniye kya guzre jadu nikal aate hain

'sabir' gham-e-hasti mein mayus na ho jaen

har haal mein jine ke pahlu nikal aate hain