gham mera dushman-e-jaani hai kaho ya na kaho

ġham mirā dushman-e-jānī hai kaho yā na kaho

mere aañsū kī zabānī hai kaho yā na kaho

raat parvāne ke mātam meñ gudāz-e-dil se

sham.a kī ashk-fishānī hai kaho yā na kaho

ġhuncha-e-gul ke ta.iiñ dekhte hī ham ne kahā

dil-e-pur-ḳhūñ kī nishānī hai kaho yā na kaho

māthā ghisne se mire mahr-jabīñ ke dar par

sub.h kī ujlī peshānī hai kaho yā na kaho

mayyat-e-ishq kā gar dekho ruḳh-e-nūrānī

maġhfirat kī ye nishānī hai kaho yā na kaho

gham mera dushman-e-jaani hai kaho ya na kaho

mere aansu ki zabani hai kaho ya na kaho

raat parwane ke matam mein gudaz-e-dil se

shama ki ashk-fishani hai kaho ya na kaho

ghuncha-e-gul ke tain dekhte hi hum ne kaha

dil-e-pur-KHun ki nishani hai kaho ya na kaho

matha ghisne se mere mahr-jabin ke dar par

subh ki ujli peshani hai kaho ya na kaho

mayyat-e-ishq ka gar dekho ruKH-e-nurani

maghfirat ki ye nishani hai kaho ya na kaho