غم نہیں لوگ جو شہزاد کی جانب ہو جائیں

غم نہیں لوگ جو شہزاد کی جانب ہو جائیں

کشتیاں ہم بھی جلا ڈالیں تو غالب ہو جائیں

سب کے سب اپنے خریدار کی جانب ہو جائیں

چاہتے ہیں کہ ذرا دام مناسب ہو جائیں

جنگ جیتے ہیں تو لہجے ہیں خداؤں کی طرح

ہارنے والوں پہ سجدے ہی نہ واجب ہو جائیں

صبح ہر شخص گنے گا نئے درجوں سے ہمیں

بس کسی شب تری خلوت کے مصاحب ہو جائیں

اب عداوت بھی حمایت بھی نہیں پوشیدہ

جتنے مجرم ہیں سبھی اہل مراتب ہو جائیں

خوشبوئیں سانسوں سے اور رنگ نگاہوں سے پڑھیں

تتلیوں پھولوں سے آؤ نا مخاطب ہو جائیں

اپنے ملبوس پہ مل کر ترے تن کی خوشبو

ہم جو محتاج ہیں اک روز میں صاحب ہو جائیں

روزن روح سے جھانکا تو یہ خواہش جاگی

بار تجسیم اٹھا لیں تری قالب ہو جائیں

بس یہ خواہش ہے جہاں جائیں تری صحبت ہو

تو اگر چاند ہو ہم نظم کواکب ہو جائیں