gham-nasibon ko kisi ne to pukara hoga

ġham-nasīboñ ko kisī ne to pukārā hogā

is bharī bazm meñ koī to hamārā hogā

aaj kis yaad se chamkī tirī chashm-e-pur-nam

jaane ye kis ke muqaddar kā sitārā hogā

jaane ab husn luTā.egā kahāñ daulat-e-dard

jaane ab kis ko ġham-e-ishq kā yaarā hogā

tire chhupne se chhupeñgī na hamārī yādeñ

tū jahāñ hogā vahīñ zikr hamārā hogā

yuuñ judā.ī to gavārā thī ye ma.alūm na thā

tujh se yuuñ mil ke bichhaḌnā bhī gavārā hogā

chhoḌ kar aa.e the jab shahr-e-tamannā ham log

muddatoñ rāh-guzāroñ ne pukārā hogā

ek tūfāñ meñ qarīb aa ga.ī apnī manzil

ham samajhte the bahut duur kinārā hogā

muskurātā hai to ik aah nikal jaatī hai

ye 'tabassum' bhī koī dard kā maarā hogā

gham-nasibon ko kisi ne to pukara hoga

is bhari bazm mein koi to hamara hoga

aaj kis yaad se chamki teri chashm-e-pur-nam

jaane ye kis ke muqaddar ka sitara hoga

jaane ab husn luTaega kahan daulat-e-dard

jaane ab kis ko gham-e-ishq ka yara hoga

tere chhupne se chhupengi na hamari yaaden

tu jahan hoga wahin zikr hamara hoga

yun judai to gawara thi ye malum na tha

tujh se yun mil ke bichhaDna bhi gawara hoga

chhoD kar aae the jab shahr-e-tamanna hum log

muddaton rah-guzaron ne pukara hoga

ek tufan mein qarib aa gai apni manzil

hum samajhte the bahut dur kinara hoga

muskuraata hai to ek aah nikal jati hai

ye 'tabassum' bhi koi dard ka mara hoga