gham-o-andoh ka sine mein samundar le kar

ġham-o-andoh kā siine meñ samundar le kar

jiye jaatā huuñ magar haath meñ sāġhar le kar

ḳhud-farebī ke añdhere meñ utar jaatā huuñ

ḳhud ko jab DhūñDtā huuñ haath meñ patthar le kar

sāmne aa.egā vo jab bhī pukārūñ us ko

apne chehre pe magar nuur kī chādar le kar

ek alhaḌ sī koī yaad bhale vaqtoñ kī

dil ke panghaT pe chalī aatī hai gāgar le kar

vaqt bhī ham se ulajh paḌtā hai ham bhī us ko

roz lalkārte haiñ haath meñ sāġhar le kar

ham fasādoñ meñ bhī hamsā.e se mil aate haiñ

kabhī patthar kabhī bhālā kabhī ḳhanjar le kar

dāvar-e-hashr se ham milne chaleñge 'rāhat'

tā.ir-e-fikr kā TuuTā huā ik par le kar

gham-o-andoh ka sine mein samundar le kar

jiye jata hun magar hath mein saghar le kar

KHud-farebi ke andhere mein utar jata hun

KHud ko jab DhunDta hun hath mein patthar le kar

samne aaega wo jab bhi pukarun us ko

apne chehre pe magar nur ki chadar le kar

ek alhaD si koi yaad bhale waqton ki

dil ke panghaT pe chali aati hai gagar le kar

waqt bhi hum se ulajh paDta hai hum bhi us ko

roz lalkarte hain hath mein saghar le kar

hum fasadon mein bhi hamsae se mil aate hain

kabhi patthar kabhi bhaala kabhi KHanjar le kar

dawar-e-hashr se hum milne chalenge 'rahat'

tair-e-fikr ka TuTa hua ek par le kar