gham-o-ranj-o-alam ke darmiyan rahna hi paDta hai

ġham-o-ranj-o-alam ke darmiyāñ rahnā hī paḌtā hai

jahāñ rakkhe ḳhudā ai dil vahāñ rahnā hī paḌtā hai

bahār-e-jāñ-fazā ho yā ḳhizāñ rahnā hī paḌtā hai

ba-har-sūrat ba-zer-e-āsmāñ rahnā hī paḌtā hai

pareshāñ-hāliyoñ meñ shādmāñ to rah nahīñ sakte

pareshāñ-hāliyoñ meñ shādmāñ rahnā hī paḌtā hai

tulū-e-zindagānī se ġhurūb-e-zindagānī tak

ravāñ rahnā hī paḌtā hai davāñ rahnā hī paḌtā hai

huī haiñ ġharq lākhoñ kashtiyāñ jis kī qayādat meñ

hameñ us nā-ḳhudā se bad-gumāñ rahnā hī paḌtā hai

kahāñ aa.e kahāñ se aur jā.eñge kahāñ yārab

kahāñ rahnā nahīñ paḌtā kahāñ rahnā hī paḌtā hai

yaqīñ jin ko nahīñ 'bismil' ḳhud apne dast-o-bāzū par

unheñ minnat-e-guzār-dīgarāñ rahnā hī paḌtā hai

gham-o-ranj-o-alam ke darmiyan rahna hi paDta hai

jahan rakkhe KHuda ai dil wahan rahna hi paDta hai

bahaar-e-jaan-faza ho ya KHizan rahna hi paDta hai

ba-har-surat ba-zer-e-asman rahna hi paDta hai

pareshan-haaliyon mein shadman to rah nahin sakte

pareshan-haaliyon mein shadman rahna hi paDta hai

tulu-e-zindagani se ghurub-e-zindagani tak

rawan rahna hi paDta hai dawan rahna hi paDta hai

hui hain gharq lakhon kashtiyan jis ki qayaadat mein

hamein us na-KHuda se bad-guman rahna hi paDta hai

kahan aae kahan se aur jaenge kahan yarab

kahan rahna nahin paDta kahan rahna hi paDta hai

yaqin jin ko nahin 'bismil' KHud apne dast-o-bazu par

unhen minnat-e-guzar-digaran rahna hi paDta hai