gham ro ro ke kahta hun kuchh us se agar apna

ġham ro ro ke kahtā huuñ kuchh us se agar apnā

to hañs ke vo bole hai ''miyāñ fikr kar apnā''

rone se tire kyā kaheñ ai dīda-e-ḳhūñ-bār

ye ḳhaak meñ miltā hai dil apnā jigar apnā

gar baiThte haiñ mahfil-e-ḳhūbāñ meñ ham us bin

sar zaanū se uThtā nahīñ do do pahar apnā

laanā hai to hamdam use lā jald ki ham ko

ahvāl nazar aa.e hai nau-e-digar apnā

bātoñ se kaTe kis kī bhalā raah hamārī

ġhurbat ke sivā koī nahīñ ham-safar apnā

aalam meñ hai ghar ghar ḳhushī-o-aish par us bin

mātam-kada ham ko nazar aatā hai ghar apnā

yā āñkhoñ se ik aan na hotā thā vo ojhal

yā jalva dikhātā nahiñ ab ik nazar apnā

har baat kā behtar hai chhupānā hī ki ye bhī

hai aib kare koī jo zāhir hunar apnā

gar rū-ba-rū us ke kisī ġham-ḳhvār ko chupke

kuchh haal sunātā huuñ maiñ bā-chashm-e-tar apnā

to kyā kahūñ kahtā hai ajab shakl se mujh ko

kuchh hoñToñ hī hoñToñ meñ vo muñh pher kar apnā

kyā kyā use dekh aatī hai 'jur.at' hameñ hasrat

māyūs jo phir aatā hai paiġhām-bar apnā

gham ro ro ke kahta hun kuchh us se agar apna

to hans ke wo bole hai miyan fikr kar apna

rone se tere kya kahen ai dida-e-KHun-bar

ye KHak mein milta hai dil apna jigar apna

gar baiThte hain mahfil-e-KHuban mein hum us bin

sar zanu se uThta nahin do do pahar apna

lana hai to hamdam use la jald ki hum ko

ahwal nazar aae hai nau-e-digar apna

baaton se kaTe kis ki bhala rah hamari

ghurbat ke siwa koi nahin ham-safar apna

aalam mein hai ghar ghar KHushi-o-aish par us bin

matam-kada hum ko nazar aata hai ghar apna

ya aankhon se ek aan na hota tha wo ojhal

ya jalwa dikhata nahin ab ek nazar apna

har baat ka behtar hai chhupana hi ki ye bhi

hai aib kare koi jo zahir hunar apna

gar ru-ba-ru us ke kisi gham-KHwar ko chupke

kuchh haal sunata hun main ba-chashm-e-tar apna

to kya kahun kahta hai ajab shakl se mujh ko

kuchh honTon hi honTon mein wo munh pher kar apna

kya kya use dekh aati hai 'jurat' hamein hasrat

mayus jo phir aata hai paigham-bar apna