gham se farigh tere hargiz dil-e-nashad na ho

ġham se fāriġh tire hargiz dil-e-nāshād na ho

jo giraftār-e-mohabbat hai vo āzād na ho

aag us ghar meñ lage tujh se jo ābād na ho

ḳhaak ho jaa.e vo dil jis meñ tirī yaad na ho

bhuul jaane se tire mujh ko ye hotā hai yaqīñ

kyā 'ajab maut ko bhī shakl mirī yaad na ho

le uḌī hai to use us kī galī meñ pahuñchā

ai sabā ḳhaak hamārī kahīñ barbād na ho

dam meñ sau rang badaltā huuñ tap-e-furqat meñ

kaise 'ājiz mirī tasvīr meñ bahzād na ho

ḳhvāb meñ bhī rahe us zulf-e-musalsal kā ḳhayāl

yā ḳhudā qaid-e-mohabbat se dil āzād na ho

'aql se kaam na rakkhe kabhī 'āshiq terā

banda-e-pīr-e-muġhāñ qā.il-e-zuhhād na ho

beḌiyāñ kitnī hī tinkoñ kī tarah toḌī haiñ

dast-e-vahshat kahīñ shākī tirā haddād na ho

be-tarah baaġh meñ gulchīñ ne havā bāñdhī hai

nik.hat-e-gul kahīñ gulzār meñ barbād na ho

shab kā hangām hai rāhat se vo ārām kareñ

gosh-zau un ke ilāhī mirī fariyād na ho

'tāliba' marne pe raazī huuñ magar ḳhauf ye hai

qatl ke baa'd bhī koī sitam ījād na ho

gham se farigh tere hargiz dil-e-nashad na ho

jo giraftar-e-mohabbat hai wo aazad na ho

aag us ghar mein lage tujh se jo aabaad na ho

KHak ho jae wo dil jis mein teri yaad na ho

bhul jaane se tere mujh ko ye hota hai yaqin

kya 'ajab maut ko bhi shakl meri yaad na ho

le uDi hai to use us ki gali mein pahuncha

ai saba KHak hamari kahin barbaad na ho

dam mein sau rang badalta hun tap-e-furqat mein

kaise 'ajiz meri taswir mein bahzad na ho

KHwab mein bhi rahe us zulf-e-musalsal ka KHayal

ya KHuda qaid-e-mohabbat se dil aazad na ho

'aql se kaam na rakkhe kabhi 'ashiq tera

banda-e-pir-e-mughan qail-e-zuhhad na ho

beDiyan kitni hi tinkon ki tarah toDi hain

dast-e-wahshat kahin shaki tera haddad na ho

be-tarah bagh mein gulchin ne hawa bandhi hai

nikhat-e-gul kahin gulzar mein barbaad na ho

shab ka hangam hai rahat se wo aaram karen

gosh-zau un ke ilahi meri fariyaad na ho

'taliba' marne pe raazi hun magar KHauf ye hai

qatl ke ba'd bhi koi sitam ijad na ho