gham se na-ahl-e-wafa hashr tak aazad na ho

ġham se nā-ahl-e-vafā hashr tak āzād na ho

mar ke sau baar ho zinda to kabhī shaad na ho

is nasheman meñ dharā kyā hai ki barbād na ho

chaar tinke hoñ paḌe aur koī buniyād na ho

kyā kahā thā tirī āñkhoñ ne nazar milte vaqt

phir nazar mujh se milā le jo tujhe yaad na ho

koī gāhak nahīñ murjhā.e hue phūloñ kā

kisī siine meñ ilāhī dil-e-nāshād na ho

ḳhush ho bulbul ki sazā-vār-e-asīrī Thahrī

vaa.e us par hai ki jis kā koī sayyād na ho

terī āñkhoñ kā jo maarā nahīñ zinda hī nahīñ

hai vahī ain ġhalat jis pe tirā saad na ho

sāmne aa ga.ī hai manzil-e-pā laġhz-e-firāq

madad ai ishq koī raah meñ uftād na ho

jo ġhubār uThtā hai kahtā hai ba-āvāz-e-buland

sar na is ḳhaak kā ūñchā ho jo barbād na ho

dil shikasta na ho TūTegā qafas ḳhud 'betāb'

vaqt kī baat hai mumkin nahīñ āzād na ho

gham se na-ahl-e-wafa hashr tak aazad na ho

mar ke sau bar ho zinda to kabhi shad na ho

is nasheman mein dhara kya hai ki barbaad na ho

chaar tinke hon paDe aur koi buniyaad na ho

kya kaha tha teri aankhon ne nazar milte waqt

phir nazar mujh se mila le jo tujhe yaad na ho

koi gahak nahin murjhae hue phulon ka

kisi sine mein ilahi dil-e-nashad na ho

KHush ho bulbul ki saza-war-e-asiri Thahri

wae us par hai ki jis ka koi sayyaad na ho

teri aankhon ka jo mara nahin zinda hi nahin

hai wahi ain ghalat jis pe tera sad na ho

samne aa gai hai manzil-e-pa laghz-e-firaq

madad ai ishq koi rah mein uftad na ho

jo ghubar uThta hai kahta hai ba-awaz-e-buland

sar na is KHak ka uncha ho jo barbaad na ho

dil shikasta na ho TuTega qafas KHud 'betab'

waqt ki baat hai mumkin nahin aazad na ho