gham tera dil mein mere phir aag sulgane laga

ġham tirā dil meñ mire phir aag sulgāne lagā

phir dhuāñ sā us se kuchh uThtā nazar aane lagā

ishq ke sadme uThā.e the bahut par kyā kareñ

ab to un sadmoñ se kuchh jī apnā ghabrāne lagā

maiñ hī kuchh be-sabr-o-tāqat ishq meñ us ke nahīñ

dil bhī ab be-tāqatī se kaam farmāne lagā

dekhte hī us ke kuchh is kī ye hālat ho ga.ī

jo mujhe samjhā.e thā maiñ us ko samjhāne lagā

raqs meñ us ke sañjāf-e-surḳh ke aalam ko dekh

sho.ala-e-javvāla dāman se lipaT jaane lagā

ho chukī fasl-e-girebāñ-chākī ab dast-e-junūñ

dhajjiyāñ kar ke mujhe dāman kī dikhlāne lagā

muñh se niklā thā mire itnā hī kyā achchhī hai zulf

sunte hī is baat ke kuchh vo to bal khāne lagā

kyuuñ na phāḌūñ maiñ girebāñ mere hote bazm meñ

ġhair se band-e-qabā vo apne khulvāne lagā

'mus.hafī' maiñ to na likhtā thā vale shauq-e-fuzūl

is zamīñ meñ phir ġhazal ik mujh se likhvāne lagā

gham tera dil mein mere phir aag sulgane laga

phir dhuan sa us se kuchh uThta nazar aane laga

ishq ke sadme uThae the bahut par kya karen

ab to un sadmon se kuchh ji apna ghabrane laga

main hi kuchh be-sabr-o-taqat ishq mein us ke nahin

dil bhi ab be-taqati se kaam farmane laga

dekhte hi us ke kuchh is ki ye haalat ho gai

jo mujhe samjhae tha main us ko samjhane laga

raqs mein us ke sanjaf-e-surKH ke aalam ko dekh

shoala-e-jawwala daman se lipaT jaane laga

ho chuki fasl-e-gireban-chaaki ab dast-e-junun

dhajjiyan kar ke mujhe daman ki dikhlane laga

munh se nikla tha mere itna hi kya achchhi hai zulf

sunte hi is baat ke kuchh wo to bal khane laga

kyun na phaDun main gireban mere hote bazm mein

ghair se band-e-qaba wo apne khulwane laga

'mushafi' main to na likhta tha wale shauq-e-fuzul

is zamin mein phir ghazal ek mujh se likhwane laga