غم تو نے کہاں گردش ایام تراشے

غم تو نے کہاں گردش ایام تراشے

خود میں نے ہی اپنے لیے آلام تراشے

یہ تیرا اگر کام نہیں امن کے داعی

پھر کس نے ہیں بستی میں یہ کہرام تراشے

بت مجھ سے نہ بن پایا کوئی تیری طرح کا

ہر چند کہ میں نے کئی اصنام تراشے

ہے تیری طرف میری نظر اب بھی ستمگر

پیکر ہے ترا یہ دل ناکام تراشے

کہتی ہے گنہ گار تجھے اس میں عجب کیا

دنیا نے تو مریم پہ بھی الزام تراشے

یہ عالم مستی میں کیا کام قمرؔ نے

میخانے کی مٹی سے نئے جام تراشے