gham tu ne kahan gardish-e-ayyam tarashe

ġham tū ne kahāñ gardish-e-ayyām tarāshe

ḳhud maiñ ne hī apne liye ālām tarāshe

ye terā agar kaam nahīñ amn ke daa'ī

phir kis ne haiñ bastī meñ ye kohrām tarāshe

but mujh se na ban paayā koī terī tarah kā

har-chand ki maiñ ne ka.ī asnām tarāshe

hai terī taraf merī nazar ab bhī sitamgar

paikar hai tirā ye dil-e-nākām tarāshe

kahtī hai gunahgār tujhe is meñ 'ajab kyā

duniyā ne to mariyam pe bhī ilzām tarāshe

ye ‘ālam-e-mastī meñ kiyā kaam 'qamar' ne

maiḳhāne kī miTTī se na.e jaam tarāshe

gham tu ne kahan gardish-e-ayyam tarashe

KHud main ne hi apne liye aalam tarashe

ye tera agar kaam nahin amn ke da'i

phir kis ne hain basti mein ye kohram tarashe

but mujh se na ban paya koi teri tarah ka

har-chand ki main ne kai asnam tarashe

hai teri taraf meri nazar ab bhi sitamgar

paikar hai tera ye dil-e-nakaam tarashe

kahti hai gunahgar tujhe is mein 'ajab kya

duniya ne to mariyam pe bhi ilzam tarashe

ye ‘alam-e-masti mein kiya kaam 'qamar' ne

maiKHane ki miTTi se nae jam tarashe