gham zamane se chhupana hi paDa

ġham zamāne se chhupānā hī paḌā

rote rote muskurānā hī paḌā

dil ko dil se bhī bachānā hī paḌā

ye bhī ġham mujh ko uThānā hī paḌā

sāzishī tirchhī nazar thī kyā kaheñ

choT khā kar muskurānā hī paḌā

pī sabhī ne maiñ hī tishna thā magar

saath un ke laḌkhaḌānā hī paḌā

un kī rusvā.ī ne jab gherā mujhe

mujh ko un se duur jaanā hī paḌā

zindagī ko aur kab tak jheltā

maut se panjā laḌānā hī paḌā

āñsuoñ ne is tarah tartīb dī

ġham kā har qissa sunānā hī paḌā

intihā-e-ishq meñ khaa.e fareb

chaah kar bhī bhuul jaanā hī paḌā

tīrgī thī aur un kī yaad thī

dil ko aise meñ jalānā hī paḌā

hāl-e-dil un se chhupāte kab talak

raaz ulfat kā batānā hī paḌā

'svāmī' un kī zid ke aage jhuk ga.e

bijliyoñ par ghar banānā hī paḌā

gham zamane se chhupana hi paDa

rote rote muskurana hi paDa

dil ko dil se bhi bachana hi paDa

ye bhi gham mujh ko uThana hi paDa

sazishi tirchhi nazar thi kya kahen

choT kha kar muskurana hi paDa

pi sabhi ne main hi tishna tha magar

sath un ke laDkhaDana hi paDa

un ki ruswai ne jab ghera mujhe

mujh ko un se dur jaana hi paDa

zindagi ko aur kab tak jhelta

maut se panja laDana hi paDa

aansuon ne is tarah tartib di

gham ka har qissa sunana hi paDa

intiha-e-ishq mein khae fareb

chah kar bhi bhul jaana hi paDa

tirgi thi aur un ki yaad thi

dil ko aise mein jalana hi paDa

haal-e-dil un se chhupate kab talak

raaz ulfat ka batana hi paDa

'swami' un ki zid ke aage jhuk gae

bijliyon par ghar banana hi paDa