ghamgin be-maza baDi tanha udas hai

ġhamgīn be-maza baḌī tanhā udaas hai

tere baġhair to mirī duniyā udaas hai

phailā huā hai raat kī āñkhoñ meñ soz-e-hijr

mahtāb-rut meñ chāñd kā chehra udaas hai

lo phir se aa gayā hai judā.ī kā marhala

āñkheñ haiñ nam mirī tirā lahja udaas hai

bārish bahā ke le ga.ī tinkoñ kā āshiyāñ

bhīge shajar kī shāḳh pe chiḌiyā udaas hai

shahzāda so gayā hai kahānī sune baġhair

bachpan ke taaq meñ rakhī guḌiyā udaas hai

āñkheñ muñDer par dhare guzrī shab-e-visāl

lipTā huā kalā.ī se gajrā udaas hai

sūraj lipaT ke jhiil ke paanī se ro diyā

manzar firāq-e-shām kā kitnā udaas hai

kis ko haiñ raas hijr kī kaThnā.iyāñ 'sahar'

jitnā qarīb ho koī utnā udaas hai

ghamgin be-maza baDi tanha udas hai

tere baghair to meri duniya udas hai

phaila hua hai raat ki aankhon mein soz-e-hijr

mahtab-rut mein chand ka chehra udas hai

lo phir se aa gaya hai judai ka marhala

aankhen hain nam meri tera lahja udas hai

barish baha ke le gai tinkon ka aashiyan

bhige shajar ki shaKH pe chiDiya udas hai

shahzada so gaya hai kahani sune baghair

bachpan ke taq mein rakhi guDiya udas hai

aankhen munDer par dhare guzri shab-e-visal

lipTa hua kalai se gajra udas hai

suraj lipaT ke jhil ke pani se ro diya

manzar firaq-e-sham ka kitna udas hai

kis ko hain ras hijr ki kaThnaiyan 'sahar'

jitna qarib ho koi utna udas hai