ghamon ki dhup thi aur saeban na milta tha

ġhamoñ kī dhuup thī aur sā.ebāñ na miltā thā

gharoñ se nikle huoñ ko makāñ na miltā thā

hamāre paañv ke nīche zamīn thī lekin

hamāre sar pe koī āsmāñ na miltā thā

tumhārā khoyā huā lams apne kamre meñ

vahīñ pe DhūñDh rahe the jahāñ na miltā thā

jo dard ham ne sañbhālā huā thā siine meñ

kise sunāte koī mehrbāñ na miltā thā

jo saañs saañs mayassar rahā mujhe barsoñ

bichhaḌ ga.e to phir us kā nishāñ na miltā thā

na.ī na.ī thī mohabbat magar diloñ meñ thī

ye aisī aag thī jis kā dhuāñ na miltā thā

vo roz baaġh meñ aatī thī sair karne ko

parinde ḳhush the unheñ āb-o-dāna miltā thā

ye log jis ke bahāo ke giit gaate the

hameñ vo dariyā kabhī bhī ravāñ na miltā thā

ham aise bolne vaale kahāñ the par 'ārib'

vo boltā to hameñ bhī bahāna miltā thā

ghamon ki dhup thi aur saeban na milta tha

gharon se nikle huon ko makan na milta tha

hamare panw ke niche zamin thi lekin

hamare sar pe koi aasman na milta tha

tumhaara khoya hua lams apne kamre mein

wahin pe DhunDh rahe the jahan na milta tha

jo dard hum ne sanbhaala hua tha sine mein

kise sunate koi mehrban na milta tha

jo sans sans mayassar raha mujhe barson

bichhaD gae to phir us ka nishan na milta tha

nai nai thi mohabbat magar dilon mein thi

ye aisi aag thi jis ka dhuan na milta tha

wo roz bagh mein aati thi sair karne ko

parinde KHush the unhen aab-o-dana milta tha

ye log jis ke bahao ke git gate the

hamein wo dariya kabhi bhi rawan na milta tha

hum aise bolne wale kahan the par 'arib'

wo bolta to hamein bhi bahana milta tha