غموں کی رات ہے بستی میں سب شجر چپ ہیں

غموں کی رات ہے بستی میں سب شجر چپ ہیں

پرندے سوگ میں بیٹھے تو ہیں مگر چپ ہیں

ہوا کے سارے سوالوں کے ہیں جواب مگر

مرے چراغ اجالوں کو دیکھ کر چپ ہیں

رفاقتوں کو تماشہ بنانے سے بہتر

ہر ایک بات تری کر کے درگزر چپ ہیں

کسی لحاظ نے سی رکھے ہیں ہمارے لب

ہمیں حقیر نہ سمجھو کہ ہم اگر چپ ہیں

بچھڑ کے سامنے آئی ہے دونوں کی فطرت

وہ قصہ گو ہیں ادھر اور ہم ادھر چپ ہیں

ابھی تلک تو ہر اک چیز بولتی تھی یہاں

یہ کیا ہوا ہے اچانک جو بام و در چپ ہیں

سوال عشق پہ ہم اس سے کر تو لیں لیکن

ہم اس سوال سے آگے کا سوچ کر چپ ہیں