ghamon se istifada kar raha hun

ġhamoñ se istifāda kar rahā huuñ

mohabbat kā i.aada kar rahā huuñ

tire naqsh-e-qadam se duur haT kar

alag ta.amīr jaada kar rahā huuñ

tire har kaam ko nekī samajh kar

zamāne se ziyāda kar rahā huuñ

Dhake tan bhī mile izzat bhī jis se

vo tahzīb-e-libāda kar rahā huuñ

kisī se daad bhī lenī hai mujh ko

bayān-e-sher saada kar rahā huuñ

hamesha sach ugalvātā rahā hai

tabhī tārīf-e-bāda kar rahā huuñ

vo jis se khā chukā huuñ maat 'jāmī'

usī kā phir irāda kar rahā huuñ

ghamon se istifada kar raha hun

mohabbat ka iada kar raha hun

tere naqsh-e-qadam se dur haT kar

alag tamir jada kar raha hun

tere har kaam ko neki samajh kar

zamane se ziyaada kar raha hun

Dhake tan bhi mile izzat bhi jis se

wo tahzib-e-libaada kar raha hun

kisi se dad bhi leni hai mujh ko

bayan-e-sher sada kar raha hun

hamesha sach ugalwata raha hai

tabhi tarif-e-baada kar raha hun

wo jis se kha chuka hun mat 'jami'

usi ka phir irada kar raha hun