غنیمت ہے وہ رسماً ہی ملے بیمار ہجراں سے

غنیمت ہے وہ رسماً ہی ملے بیمار ہجراں سے

کہ یہ دستور بھی اب اٹھ رہا ہے بزم امکاں سے

ارادہ ہے کہ ہم جلوؤں کو دیکھیں چشم حیراں سے

تمہارے نام پر ٹکرائیں گے کشتی کو طوفاں سے

مرا دل خون ہو کر بہہ رہا ہے چشم گریاں سے

یہ دھبہ حشر تک اب کیا چھٹے گا ان کے داماں سے

نیاز و ناز کی تصویر کوئی کھینچ لے اس دم

چھڑائیں گے وہ داماں اور میں لپٹوں گا داماں سے

نہ ہونے دی ندامت حشر میں غارت گر دل کو

سنائی داستان درد و غم قسمت کے عنواں سے

دل بیتاب کی آنکھوں میں اک تصویر کھنچ آئی

ابھی اک اشک تھرا کر گرا ہے نوک مژگاں سے

ابھی ان کی نظر میری نظر سے مل کے پلٹی ہے

یہ کس نے دفعتاً اک تیر سا کھینچا رگ جاں سے

کچھ ایسے مطمئن بیٹھے ہیں راہ دوست میں نخشبؔ

کہ جیسے خوب واقف ہوں ہم اپنے دل کے درماں سے