ghanimat hai wo rasman hi mile bimar-e-hijran se

ġhanīmat hai vo rasman hī mile bīmār-e-hijrāñ se

ki ye dastūr bhī ab uTh rahā hai bazm-e-imkāñ se

irāda hai ki ham jalvoñ ko dekheñ chashm-e-hairāñ se

tumhāre naam par Takrā.eñge kashtī ko tūfāñ se

mirā dil ḳhuun ho kar bah rahā hai chashm-e-giryāñ se

ye dhabba hashr tak ab kyā chhuTegā un ke dāmāñ se

niyāz-o-nāz kī tasvīr koī khīñch le us dam

chhuḌā.eñge vo dāmāñ aur maiñ lipTūñgā dāmāñ se

na hone dī nadāmat hashr meñ ġhārat-gar-e-dil ko

sunā.ī dāstān-e-dard-o-ġham qismat ke unvāñ se

dil-e-betāb kī āñkhoñ meñ ik tasvīr khiñch aa.ī

abhī ik ashk tharrā kar girā hai nok-e-mizhgāñ se

abhī un kī nazar merī nazar se mil ke palTī hai

ye kis ne daf.atan ik tiir sā khīñchā rag-e-jāñ se

kuchh aise mutma.in baiThe haiñ rāh-e-dost meñ 'naḳhshab'

ki jaise ḳhuub vāqif hoñ ham apne dil ke darmāñ se

ghanimat hai wo rasman hi mile bimar-e-hijran se

ki ye dastur bhi ab uTh raha hai bazm-e-imkan se

irada hai ki hum jalwon ko dekhen chashm-e-hairan se

tumhaare nam par Takraenge kashti ko tufan se

mera dil KHun ho kar bah raha hai chashm-e-giryan se

ye dhabba hashr tak ab kya chhuTega un ke daman se

niyaz-o-naz ki taswir koi khinch le us dam

chhuDaenge wo daman aur main lipTunga daman se

na hone di nadamat hashr mein ghaarat-gar-e-dil ko

sunai dastan-e-dard-o-gham qismat ke unwan se

dil-e-betab ki aankhon mein ek taswir khinch aai

abhi ek ashk tharra kar gira hai nok-e-mizhgan se

abhi un ki nazar meri nazar se mil ke palTi hai

ye kis ne dafatan ek tir sa khincha rag-e-jaan se

kuchh aise mutmain baiThe hain rah-e-dost mein 'naKHshab'

ki jaise KHub waqif hon hum apne dil ke darman se