gar adu taqdir hai tadbir rahne dijiye

gar adū taqdīr hai tadbīr rahne dījiye

dost kā dil meñ hamāre tiir rahne dījiye

haiñ jo āshiq kaam mazdūroñ kā vo karte nahīñ

zimma-e-farhād jū-e-shīr rahne dījiye

lailā-o-majnūñ kī ik kāġhaz pe hotī hai shabīh

rū-ba-rū us ke mirī tasvīr rahne dījiye

hai junūñ faslī karo zanjīr tār-e-ashk se

taur par mere mirī tadbīr rahne dījiye

sīm-o-zar bantā hai ḳhāk-e-kushta-dil se aap ke

paas apne jaan kar iksīr rahne dījiye

āstīñ se haath bāhar ho na ai jān-e-jahāñ

bas miyāñ andar hī ye shamshīr rahne dījiye

tīr-e-be-paikāñ nishāna toḌtā hai kab 'vaqār'

muñh kī muñh meñ āh-e-be-tāsīr rahne dījiye

gar adu taqdir hai tadbir rahne dijiye

dost ka dil mein hamare tir rahne dijiye

hain jo aashiq kaam mazduron ka wo karte nahin

zimma-e-farhad ju-e-shir rahne dijiye

laila-o-majnun ki ek kaghaz pe hoti hai shabih

ru-ba-ru us ke meri taswir rahne dijiye

hai junun fasli karo zanjir tar-e-ashk se

taur par mere meri tadbir rahne dijiye

sim-o-zar banta hai KHak-e-kushta-dil se aap ke

pas apne jaan kar iksir rahne dijiye

aastin se hath bahar ho na ai jaan-e-jahan

bas miyan andar hi ye shamshir rahne dijiye

tir-e-be-paikan nishana toDta hai kab 'waqar'

munh ki munh mein aah-e-be-tasir rahne dijiye